Muallif: RAHMATULLA SAMADOV
Ijrochilik omili azal-azaldan xalqlar milliy an'analarining avloddan-avlodga o'tishdagi jonli jarayon bo'lib kelgan. Shu bilan birga milliy ma'naviyat negizidagi bir qator urf-odatlar va qadriyatlarning tarkibiy qismi sifatida ham muhim ahamiyat kasb etgan. Ularning rang-barangligi, ko'p xilliligi ham shundadir. Shuningdek, o'tmishdan juda ko'p o'zga sohalarning peshqadam namoyondalari cholg'u ijrochiligidan xabardor bo'lganlar. Shu boisdan ular o'z asarlarida o'zlari yashagan zamon cholg'u ijrochiligi, cholg'ulari, cholg'uchi va xonandalari haqida fikr yozish bilan birga, yirik tadqiqotlar ham olib borganlar. Al-Farobiy, Ibn Sino, Umar Xayyom, Abulqosim Firdavsiy, Abdurahmon Jomiy, Alisher Navoiy, Abdurauf Fitrat kabi o'tmish olimlari shular jumlasidandir. Hozirgi davrda mavjud musiqiy cholg'ularning o'quv tizimidagi sabog'ini joriy qilish yo'lida bir qator o'quv va uslubiy qo'llanmalar yaratilgan. Shuningdek, zarbli cholg'u doira sinfi bo'yicha ham. Doira ijrochiligi - cholg'uchilik jarayonidagi ikki muhim nuqtalardan biridir. Shu bois, har qanday musiqa (badihaga asoslanganlari bundan mustasno) doira zarblari bilan to'laqonlidir.